Si të rimodeloni shtëpinë në mënyrën më praktike

Ka ardhur momenti të investoni për shtëpinë tuaj ose rimodelimin e saj. Përcaktoni ndarjen e dhomave, arredimin  e tyre dhe mos kurseni për komoditet.

Ngjyrat më të preferuara, izolimi nga zhurmat dhe ekspozimi ndaj diellit. Ja se çfarë duhet pasur parasysh


 

Këshillohuni me një arkitekt dizajner

 

Rimodelimi i shtëpisë është një event tepër serioz. Një shtëpi e bukur, e modeluar mirë dhe sipas shijeve më të fundit duhet patjetër të ketë një ndërtim të fortë të gjithë arkitekturës e sidomos kërkon të ketë mure të fortë. Një krisje e tyre në një sezon të caktuar do të dukej tmerrësisht keq në një ambient shtëpie.

Apartamenti ku jetoni ndryshon nga një shtëpi private, ku mund të bëni një rikonstruktim të papritur të shtëpisë dhe si rrjedhojë rindërtimin e mureve të rinj. Zhvendosja e dhomave, e kuzhinës apo tualetit nuk aq lehtë sa mund ta keni menduar. Në raste të tilla këshilla më e mirë do të ishte konsultimi me një arkitekt dizajner, i cili do t’ju ndihmonte për t’ju dhënë ide profesionale se si mund të rikonstruktoni mure dhe pjesë të shtëpisë suaj.

 

Zgjidhni pozicione me diell

Një dizajner profesionist mund të t’ju ndihmojë mbi të gjitha për t’i dhënë një orientim të mirëfilltë shtëpisë suaj. Cila do të ishte pamja më e këndshme që do donit të shihnit në mëngjes dhe nga cila dhomë do donit më tepër dritë dhe diell. Këto janë disa detaje, të cilat nuk i mendojmë shumë në fillim kur modelojmë një shtëpi. Por më pas kur gjithçka ka përfunduar dhe shohim që dhoma e ngrënies apo kuzhina janë të errëta ndihemi me të drejtë të pakënaqur. Një shtëpi me diell është gjithmonë më e bukur se një pa dritë dhe e errët.

 

Kujdes me dhomat e tepërta 

Vendosni sa dhoma do të donit të kishit në shtëpinë tuaj. Por mundohuni të planifikoni sipas mundësisë dhe hapsirës që dispononi. Mendoni se cilat janë disa nga dhomat më të rëndësishme që do t’ju duheshin vërtet. Bëhuni realist- mos planifikoni dhjetë dhoma në një apartament, sipërfaqja e të cilit arrin deri në 50 metër katror. Mos harroni për depot, të cilat i duhen gjithmonë një shtëpie dhe në pjesën më të madhe ato mungojnë.

 

 

 

 

 

 

Sa mundësi keni realisht

Nëse do të ndryshonit vetëm disa dhoma duhet të keni parasysh se tualeti nuk duhet vendosur asnjëherë pranë dhomës së gjumit. Imagjinoni një lavatriçe e cila punon gjithë natën e duket se është pranë krevatit tuaj. Kush do ta pëlqente një situatë të tillë. Duhet të jeni shumë preciz e të saktë në rimodelimin e dhomave tuaja. Përpara se të filloni mund të pyesni edhe fqinjët tuaj nëse janë të mundshme ndryshime të tilla.

 

 

 

Ngjyrat më të preferuara

Përzgjedhja e ngjyrës është një nga detajet më të rëndësishme. Kujdes! Shpesh tendenca është që të zgjidhen ngjyra të rënda, të  forta apo agresive. Shtëpia është vendi ku njeriu kërkon gjithmonë qetësinë, shplodhjen ndaj ngjyrat e buta do të ishin më të përshtatshme. Sigurisht që ngjyrat duhet të jenë në përshtatje me mobiljet dhe çdo arredim që ju keni zgjedhur. Ngjyrat jeshile, pana, lejla e hapur, apo limon janë moderne, komode dhe ato që do të sugjeroheshin më tepër.

 

Investoni për komoditetin

Planifikoni një apartament për të ardhmen, por jo më shumë se pesë vjet. Nëse keni një fëmijë në shtëpi, sidomos të vogël, pas një ose dy vitesh do të kërkojë për hapsirën e tij për t’u argëtuar. E më pas do të kërkojë edhe për dhomën, krevatin, apo dollapin personal.

Nëse do donit të bënit ndryshime për rimodelimin e shtëpisë duke përfshirë mobilje të reja mos bëni shpenzime të skajshme. Mund të blini gjëra me çmim të leverdisshëm dhe përsëri të jenë brenda stilit bashkëkohor. Për më tepër, ajo që ka vërtet rëndësi është komoditeti. Mundohuni që çdo gjë të jetë praktike, në funksionin tuaj.

 

Sa më shumë rafte

Mos harroni edhe izolimin nga zhurmat. Ngjitur me muret mundohuni të vini sa më shumë mobilje si dhe rafte librash, disqesh, fotosh apo suvenirësh dhe sendesh të ndryshme. Duke i mbushur raftet zhurma e apartamentit ngjitur do të jetë më e vështirë për t’u ndjerë.

Artikuj të ngjashëm:


Comments are closed.